काठमाडौं: सरकारले गएको शुक्रबार र शनिबार परेको भारी वर्षासँगै आएको बाढी र पहिरोबाट १७ अर्ब रुपैयाँभन्दा बढी क्षति भएको प्रारम्भिक अनुमान गरेको छ । प्रधानमन्त्री केपी शर्मा ओलीले मंगलबार आयोजना गरेको पत्रकार सम्मेलनमा मुख्य सचिव एकनारायण अर्यालले प्रारम्भिक क्षतिबारे जानकारी दिए ।
उनका अनुसार अहिलेसम्म यो विपत्तिबाट २२४ जनाको मृत्यु भएको छ भने २४ जना बेपत्ता भएका छन् । यस्तै १५८ जना घाइते भएका छन् । सरकारले बाढी, पहिरो र डुवानबाट खानेपानीको संरचनामा ३ खर्ब ५५ करोड, सडक पूर्वाधारतर्फ २ अर्ब ५२ करोड, उर्जातर्फ ४ अर्ब, सिँचाईतर्फ २ अर्ब र कृषि तथा पशुपक्षीतर्फ ६ अर्बको क्षति भएको प्रारम्भिक अनुमान गरेको छ ।
कृषि बालीमा भएको क्षतिको विवरण एक महिनाभित्र तयार पार्ने जानकारी मुख्य सचिव अर्यालले दिए । यस्तै खोज तथा उद्दार कार्य २ दिनभित्र सक्ने र एकद्धार प्रणालीमार्फत राहत वितरण गर्ने सरकारले योजना बनाएको पनि उनले जानकारी दिए । घरबारबिहीन भएकालाई सरकारले तोकेको स्थानमा अस्थायी आवास बनाउन दिइने मुख्य सचिव अर्यालले जानकारी दिए ।
ठूलो विपदका लागि पूर्वतयारी थिएन: ओली
प्रधानमन्त्री केपी ओलीले सरकारले यति ठूलो बाढी पहिरो आउला भनेर पूर्वानुमान नगरेको बताए । पूर्वानुमान नगरेका कारण तयारी पनि त्यस किसिमको नभएको उनले स्विकार गरे । ‘हाम्रो तयारी यस प्रकारको विपत्तिका लागि थिएन । यस प्रकारको वर्षा होला, पहिरो जाला, मानवीय तथा भौतिक क्षति होला भन्ने अनुमान थिएन,’ ओलीले भने ।
‘पहिला यस प्रकारका ठूला विपदका घटना कमै हुने गर्थै, त्यसैअनुसार पूर्व तयारी गरिन्थ्यो । अहिले ठूलै विपत्ति आइलाग्यो’ उनले भने । विपद आइसकेपछि भने सरकारले राहत तथा उद्दारमा सक्दो गरेको प्रधानमन्त्री ओलीले दावी गरे । ‘सरकारले केही गर्दै नगरेको होइन । सक्दो गरेको छ’, उनले भने, ‘केही कमजोरी भएको हुनसक्छ । त्यस्तो छ भने आगामी दिनमा सच्याउनुपर्छ ।’
खुल्ला प्रेस । १५ आश्विन २०८१, मंगलवार २०:४३