सुदूरपश्चिम रोयल्सले जित्यो एनपिएल तेस्रो संस्करणको उपाधि

काठमाडौँः  सुदूरपश्चिम रोयल्सले नेपाल प्रिमियर लिग (एनपिएल)को तेस्रो संस्करणको उपाधि जितेको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा आज भएको फाइनलमा साविक विजेता लुम्बिनी लायन्सलाई १० विकेटले पराजित गर्दै सुदूरपश्चिम पहिलो पटक च्याम्पियन बनेको हो ।

यससँगै सुदूरपश्चिमले लगातार तेस्रो पटक फाइनल खेलेर पहिलो पटक उपाधि उचालेको छ । उपाधिसँगै सुदूरपश्चिमले एक करोड ५० लाख रुपियाँ पुरस्कार प्राप्त गरेको छ । उपविजेता लुम्बिनी लायन्सले ८० लाख रुपियाँ पाएको छ ।

लुम्बिनी लायन्सले दिएको १५६ रनको लक्ष्य सुदूरपश्चिम रोयल्सले १३.३ ओभरमै कुनै विकेट नगुमाई पूरा गर्‍यो । सुदूरपश्चिम रोयल्सको जितमा जर्ज मन्सेले अविजित १२५ रनको शतकीय पारी खेले । उनले ५४ बलमा १२ छक्का र ८ चौका प्रहार गरे । अर्का ओपनर विनोद भण्डारी २७ बलमा ३० रन बनाएर अविजित रहे ।

यसअघि टस हारेर पहिले ब्याटिङ गरेको लुम्बिनी लायन्सले निर्धारित २० ओभरमा छ विकेट गुमाएर १५५ रन बनाएको थियो । लुम्बिनी लायन्सका लागि दिलिप नाथले अविजित ३९, कप्तान रोहित पौडेलले ३०, निरोशन डिकवेलाले २८ तथा अलि शेखले २४ रन बना ए । डार्सी शर्टले २१ रन जोडे।

त्यस्तै सुदूरपश्चिमका स्कट कुगलेइनले चार ओभरमा २५ रन खर्चेर दुई विकेट लिए । हेमन्त धामी, दीपेन्द्रसिंह ऐरी र थरिन्दु रत्नायकेले १/१ विकेट लिए।

हाम्राे जानकारी

तपाईहरुसंग कुनै समाचार बन्ने सामाग्री छन् वा तपाईहरु लेख तथा कला साहित्यको रचना गर्नुहुन्छ यदि छन भने हामीलाई पठाउन नभुल्नुहोला हामी प्रथमिकताका साथ प्रकाशन गर्नेछौँ ।
लेख तथा समाचार पठाउने माध्याम :
इमेलः [email protected],[email protected] सम्पर्क नं. ९८५८०८८३१०,९८६८९१२२१५