दैलेख : नेपाल कम्युनिष्ट पार्टी एमालेका केन्द्रीय सल्लाहकार परिषद् सदस्य गोपाल नेपालीले प्रतिनिधि सभा सदस्यका लागि स्वतन्त्र उम्मेदवारी दर्ता गराएका छन्। उनले दैलेख क्षेत्र नं १ बाट प्रतिनिधि सभा सदस्यका लागि स्वतन्त्र उम्मेदवारी दर्ता गराएका हुन्।
एमाले दैलेखका पुराना नेता मानिने नेपालीले पटक-पटक नेतृत्वले विभिन्न आश्वासन देखाउने र कार्यान्वयन नगर्ने गरेका कारण आफूले दैलेख क्षेत्र नं १ बाट प्रतिनिधि सभा सदस्यका लागि स्वतन्त्र उम्मेदवारी दर्ता गराएको बताए।
‘०४७ बाट एमालेको राजनीतिमा लागेको हुँ, विगतमा तीन पटक समानुपातिक सूचीमा जिल्लाबाट नाम जाँदा समेत नेतृत्वले समेटेन, अहिले पनि जिल्ला र प्रदेशबाट १ नम्बरमा दलितबाट समानुपातिक सूचीमा नाम जाँदा समेटिएन, नेतृत्वको अपरिपक्वता कारण स्वतन्त्र उम्मेदवारी दर्ता गराउन बाध्य भएँ’, नेपालीले भने।
दुई प्रतिनिधि सभा निर्वाचन क्षेत्र र चार प्रदेश सभा निर्वाचन क्षेत्र रहेको दैलेखमा एमालेले प्रतिनिधि सभा निर्वाचन क्षेत्र नं १ तर्फ एमाले दैलेखका अध्यक्ष रवीन्द्रराज शर्मालाई आधिकारीक उम्मेदवार बनाएको छ।
खुल्ला प्रेस । २३ आश्विन २०७९, आईतवार १३:५९