दैलेखः दैलेख प्रहरीले असार महिनाभर १६ वटा विभिन्न प्रकृतिका अपराधका मुद्दा दर्ता भएका छन्।एक महिनाको अवधिमा मात्रै १६ मुद्दा दर्ता भएको जानकारी दैलेख प्रहरीले दिएको छ ।
जिल्ला प्रहरी कार्यालयले सार्वजनिक गरेको असार महिनाको मासिक प्रगति विवरण अनुसार जघन्य अपराधका २, गम्भीर अपराधको १र सामान्य अपराधका ३ मुद्दा दर्ता भएका छन्।
यस अवधिमा कर्तव्य ज्यानका ८, भवितव्य ज्यानका ३, सवारी भवितव्यका २ र विष सेवनका २ गरी १६ वटा मुद्दा दर्ता भएका जिल्ला प्रहरी कार्यालय दैलेखका सूचना अधिकारी प्रहरी निरीक्षक पुष्पराज रोकायले जानकारी दिए ।
फरार रहेका ८ प्रतिवादी पक्राउ परेका छन् भने फैसला कार्यान्वयनबाट ६ लाख १२ हजार रुपैयाँ जरिवाना असुलीका साथै १२ वर्ष ११ महिना ८ दिन कैद सजाय कार्यान्वयन गरिएको उनले जानकारी दिएका छन् ।
प्रहरीको प्रतिवेदन अनुसार ११ वटा पालिकाबाट घरेलुहिंसा सम्बन्धी १७ र सामाजिक हिंसा सम्बन्धी २४ गरी ४१ वटा उजुरी परेकोमा ३८ वटा उजुरीको मिलापत्र गराइएको छ ।१ महिनाको अनधिमा ५ जनाले आत्महत्या गरेका छन् भने ७ जनाले आत्महत्याको प्रयास गरेका छन् ।
असार महिनामा जिल्लामा ५ वटा सवारी दुर्घटना भएका छन्। दुर्घटनामा ४ जनाको मृत्यु, ४ जना घाइते र ७ जनाको उद्धार गरिएको जिल्ला प्रहरी कार्यालय दैलेखका इञ्चार्ज डीएसपी श्रवणकुमार बिकले बताए । साँघुरा तथा जीर्ण सडक, तीव्र गति र ओभरटेकका कारण अधिकांश दुर्घटना हुने गरेको विश्लेषण गरिएको छ। यस अवधिमा ट्राफिक कारबाहीबाट ४ लाख ४४ हजार ५०० रुपैयाँ राजस्व संकलन भएको छ।
विपद्का ५ वटा घटनामा १ जनाको मृत्यु र १ जना घाइते भएका छन्। आगलागी, अविरल वर्षा र चट्याडका घटनाबाट करिब ८ लाख २० हजार रुपैयाँ बराबरको क्षति भएको डीएसपी बिकले जानकारी दिए।
खुल्ला प्रेस । ५ श्रावण २०८३, मंगलवार ०७:४६