दैलेखः झोलुङ्गे पुल जीर्ण बनेपछी जोखिम मोलेरै यात्रा गर्नु पर्ने बाध्यता भगवतिमाई गाउँपालिकाका नागरिकको छ । भगवतीमाई गाउँपालिका–७ र ६ स्थित जोतिङ्ग खोलामा पुल मर्मत नहुँदा बर्सातको समयमा स्थानीयलाई जोखिम मोलेरै यात्रा गर्नु पर्ने बाध्यता बनेको हो ।
खोलामा पुल मर्मत नहुँदा स्थानीय सोही पुलबाट जोखिम मोलेर आउजाउ गर्ने गरेको स्थानीय खगीसरा बुढाले बताइन् । उनले वडा–७ र ६ स्थित जोड्ने पुल वर्षौं डेर दशक अघि निर्माण भएको र पछिल्लो समयमा पुलका फल्याक कुहेर झरिसकेकाले आवतजावत गर्न अप्ठ्यारो भएको बताइन् ।
भगवतीमाई गाउँपालिका–७ का वडाध्यक्ष पूर्ण थापाले पुल मर्मत नहुँदा स्थानीयलाई पालिका आउन समस्या भएको बताए । उनले वर्षा लागेपछि पुल जीर्ण भएको बताए। पुल मर्मतको लागि दार च्यातेर शुक्रबारबाट पालिकाले पुलको काम थाल्ने वडाध्यक्ष थापाको भनाइ छ ।
भगवतीमाई गाउँपालिकाको मुख्य बजार बेस्तडा आउने पुल नहुँदा वर्षौंदेखि दुःख खेप्दै आएका भगवती गाउँपालिका–७ का स्थानीय चित्रबहादुर खड्का बताउँछन् उनले विद्यार्थी, शिक्षक, स्थानीयलाई समस्या हुने गरेको बताए ।
पालिकाले पुलको आवश्यकता भएको ठाउँमा पुल निर्माणका लागि बजेट छुट्याएको भगवतीमाई गाउँपालिका अध्यक्ष गणेशबहादुर थापाले बताए ।
यता भगवतिमाई गाउँपालिमा वडा नम्बर ४ र ३ जोड्ने सान्तडा खोलामा पुल नहुँदा नागरिकहरु जोखिम मोलेरै यात्रा गर्छन । अस्पताल जाने कर्मचारी तथा साधारण नागरिकहरुलाई आवत जावतमा समस्या भएको छ ।
खुल्ला प्रेस । २३ श्रावण २०८२, बिहीबार १८:००