दैलेखः सदर मतको १० प्रतिशत मत ल्याउन नसक्ने दैलेखका १३ जनाको जमानत जफत भएको छ । यही फागुन २१ गते सम्पन्न भएको प्रतिनिधि सभा सदस्यको निर्वाचनमा सदर मतको १० प्रतिशत मत प्राप्त गर्न नसक्ने उम्मेदवारको जमानत जफत भएको हो । दैलेख निर्वाचन क्षेत्र न-१ मा १० जना उम्मेदवार मध्ये ६ जनाको र दैलेख निर्वाचन क्षेत्र न-२ मा ११ जना मध्ये ७ जनाको जमान जफत भएको मुख्य निर्वाचन अधिकृतको कार्यालय दैलेखले जानकारी दिएको छ ।
दैलेख १ मा राप्रपाका रणवहादुर सिंह, नेमकिपाका जगतवहादुर वली, नेकपा माओवादीका रामलाल विश्वकर्मा, राष्ट्रिय जनमोर्चाका नरवहादुर सिंह, स्वतन्त्र उम्मेदवार लोकबहादुर बोगटी र आम जनता पार्टीका मेनका श्रेष्ठको जमानत जफत भएको मुख्य निर्वाचन अधिकृत दैलेख जिल्ला न्याधिस कुल प्रसाद पाण्डेले जानकारी दिए ।
यस्तै दैलेखमा २ मा नेमकिपाका बखत थापा, राप्रपाका बबिता शाही, नेकपा माओवादीका कलम सिंह, राष्ट्रिय जनमोर्चाका कमल बरैमगर, स्वतन्त्र उम्मेदवार हिम बहादुर शाही, आम जनता पार्टीका तिर्था बंसिमगर र स्वतन्त्र उम्मेदवार लाल बहादुर कठायतको जमानत जफत भएको दैलेख निर्वाचन क्षेत्र न-२ का निर्वाचन अधिकृत लोकहरी कँडेलले जानकारी दिए ।
दैलेख निर्वाचन क्षेत्र न-१ मा ३७ हजार ५ सय ७५ र क्षेत्र न-२ मा ३६ हजार ५ सय १३ मत सदर भएको थियो ।
खुल्ला प्रेस । २७ फाल्गुन २०८२, बुधबार १२:००