काठमाडौंः नेपाली कांग्रेसको १५औँ महाधिवेशनबाट सभापतिमा निर्वाचित गगनकुमार थापाले दसैँअघि नै शपथग्रहण गरेका छन् । यद्यपि, बाँकी पदाधिकारी र केन्द्रीय सदस्यको शपथको मितिको टुंगो भने अझै लागेको छैन ।
सभापति थापाले असोज ३१ गते पद तथा गोपनीयताको शपथ लिएका थिए । ललितपुरको सानेपास्थित पार्टी केन्द्रीय कार्यालयमा आयोजित विशेष समारोहमा कांग्रेस निर्वाचन समितिका संयोजक प्रेमबहादुर खड्काले उनलाई शपथ गराएका थिए ।
सभापति थापाले अब नवनिर्वाचित पदाधिकारी र केन्द्रीय सदस्यहरूलाई शपथ गराउनेछन् ।
यसअघि १५औँ महाधिवेशनबाट निर्वाचित केन्द्रीय कार्यसमितिका पदाधिकारी र सदस्यहरूको शपथग्रहण दसैँको पूर्णिमापछि गर्ने भनिएको थियो । तर, त्यसको मिति भने तय भइसकेको छैन ।
कांग्रेस नेता देवराज चालिसे पदाधिकारी र सदस्यहरूको शपथ पूर्णिमापछि हुने बताउँछन् । तर, मिति भने तय भइनसकेको उनको भनाइ छ । शपथग्रहणपछि बस्ने केन्द्रीय कार्यसमितिको बैठकले प्रदेश र जिल्ला कार्यसमितिहरूको अधिवेशनबारे निर्णय गर्ने उनले बताए ।
कांग्रेस प्रमुख सचेतकसमेत रहेकी केन्द्रीय सदस्यमा निर्वाचित वासना थापाले कात्तिक १२–१३ गतेतिर पदाधिकारी र केन्द्रीय सदस्यहरूको शपथग्रहण कार्यक्रम आयोजना हुन सक्ने बताइन् ।
दसैँको टीकाका लागि आफ्नो निर्वाचन क्षेत्रमा गएका नेताहरू काठमाडौं फर्किनसकेकाले बिहीबार–शुक्रबारसम्म मात्रै शपथग्रहणको कार्यक्रमबारे टुंगो लाग्न सक्ने उनको भनाइ छ ।
“नवनिर्वाचित केन्द्रीय कार्यसमितिले प्रदेश र जिल्लाको अधिवेशनको मिति तोक्नुपर्ने छ । शपथग्रहणपछि बस्ने नयाँ कार्यसमितिको बैठकले मिति तोक्ने हो,” उनले भनिन् ।
खुल्ला प्रेस । ९ कार्तिक २०८३, आईतवार १३:१५